Вместо предисловия

Житие и чудеса
преподобного Феодосия Кавказского

Духовное наследие
старца Феодосия

Прославление и почитание
старца Феодосия

Акафист и молитвы
преподобному Феодосию Кавказскому

Другие святые
Юга России

Православные строки


. . . . . . . . . . . . . . . . . . . . . .

письмо администратору
сайта

Акафист преподобному
Феодосию Кавказскому

Кондак 1

Избранный угодниче Христов и преславный чудотворче, преподобне отче Феодосие, подвиги твоими Ангелы удививый и человеки многия из глубины греховныя изведый, умоли и о нас прославльшаго тя Господа и от бед и напастей нас свободи, любовию зовущих ти: Радуйся, преподобне Феодосие, Кавказский чудотворче.

Икос 1

Ангелов Творец избра тя от чрева матере твоея и в рождестве твоем показа знамение будущаго монашескаго жития твоего, да будеши, богоблаженне Феодосие, молитвенник ко Господу и Пречистей Его Матери за весь мир. Мы же, грешнии, уповающе на скорую помощь твою, взываем ти сице:
Радуйся, от чрева матере Господом избранный;
радуйся, еще в детстве к служению Богу преднареченный.
Радуйся, в рождестве твоем чудное знамение монашескаго жития явивый;
радуйся, в юности строгость монашескаго жития показавый.
Радуйся, Христа всем сердцем возлюбивый;
радуйся, ум и сердце Господу предавый.
Радуйся, народа российскаго молитвенное ограждение;
радуйся, земли Кавказския священное украшение.
Радуйся, преподобне Феодосие, Кавказский чудотворче.

Кондак 2

Видя Господь благое сердца твоего изволение, яко от младенчества имел еси велию любовь к Нему и немолчно прославлял еси Имя Господне, уготова ти ангельское житие во Святей Горе Афонстей. Там же во смирении и послушании пребывал еси, научая нас Единаго Бога любити и Того ради вся земная презирати, вопиюще Ему: Аллилуиа.

Икос 2

Разум имея Богом просвещенный, преподобне отче Феодосие, на Раевом камени от младенчества молитися Богу навыкл еси, веру крепкую, надежду несумненную, любовь истинную к Нему стяжал еси и стопы своя ко Святей Горе Афонстей направивый, темже ублажаем тя сице:
Радуйся, от младенчества молитву ко Господу устами творивый;
радуйся, с ранних лет любовию пламенною к Нему горевый.
Радуйся на Святей Горе Афонстей во отрочестве ангельски поживый;
радуйся, тамо многая послушания понесый.
Радуйся, усердный к Богу и Матери Божией молитвенниче;
радуйся, истиннаго покаяния проповедниче.
Радуйся, скорбящим скорое утешение и вразумление;
радуйся, присное и неложное их успокоение.
Радуйся, преподобне Феодосие, Кавказский чудотворче.

Кондак 3

Силу, данную ти свыше, приял еси, преподобне отче Феодосие, изгоняти всякую силу вражию. И того ради с кротостию и смирением уврачевал еси одержимую бесом жену знатную, да сие чудо видяще, вси людие прославят Бога, вопиюще Ему: Аллилуиа.

Икос 3

Имуще тя, изрядный угодниче Христов Феодосие, воителя противу силы бесовския, теплаго молитвенника и предстателя пред Господем о нас, недостойных, любовию твоею побеждаеми, со умилением зовем ти:
Радуйся, во юности Духа Святаго от Господа получивый;
радуйся, жену знатную, бесом одержимую, еще отрок сый, исцеливый.
Радуйся, воине Христов добропобедный;
радуйся, предстателю о нас к Богу и Богородице непостыдный.
Радуйся, силу чудес от Бога явивый;
радуйся, плотския похоти умертвивый.
Радуйся, Небеснаго Царя избранниче предивный;
радуйся, козни диавольския победивый.
Радуйся, преподобне Феодосие, Кавказский чудотворче.

Кондак 4

Бурю гнева неправеднаго зависти ради от братии претерпел еси, блаженне Феодосие, теми в нечистоты вверженный, Пречистою же Богородицею чудесно извлеченный. Сего ради, зрящи о тебе таковое Матери Божия благоволение, вопием Всевышнему Богу: Аллилуиа.

Икос 4

Слышаша вси людие о чудеснем излиянии милости Пресвятыя Девы Марии и Архистратига Божия Михаила, на тебе бывшем, мы же грешнии прославляем дивнаго во святых Своих Господа и Его Пречистую Матерь со Архангелом и вопием ти:
Радуйся, Царицею Небесною от смерти спасенный;
радуйся, Архистратигом Михаилом от посрамления избавленный.
Радуйся, тесный путь спасения возлюбивый;
радуйся, ярем Господень на выю свою возложивый.
Радуйся, от братии в монастыре всяческая поношения претерпевый;
радуйся, младенческое незлобие имевый.
Радуйся, рабе Господень благий и верный;
радуйся, скорый помощниче всем скорбящим и обремененным.
Радуйся, преподобне Феодосие, Кавказский чудотворче.

Кондак 5

Божественный Огнь Благодатный видя, на гробе Господнем в Великую Субботу чудесно возгараемый, и сим Огнем освященный, многая лета послужил еси, преподобне отче Феодосие, во Святей Земли, выну взывая Богу: Аллилуиа.

Икос 5

Видяще тя очима веры чада твоя, преподобне отче Феодосие, со благоговением у Гроба Господня служаща и со дерзновением Ему мольбы о стране Российстей приносяща, удивлением объяты, благодарно вопием ти:
Радуйся, в Земли Святей благодатно поживый;
радуйся, по стопам Спасителя ходивый.
Радуйся, Огнь Благодатный зревый;
радуйся, пламень любве к Богу имевый.
Радуйся, пред Гробом Господним служителю предивный;
радуйся, молитвенниче к Богу и Богородице о нас неусыпный.
Радуйся, веру Христову миру являяй;
радуйся, всюду Христа прославляяй.
Радуйся, преподобне Феодосие, Кавказский чудотворче.

Кондак 6

Проповедник смирения и покаяния был еси, отче, примером жития твоего незлобие и всепрощение показуя, якоже светило многосветлое тьму неведения и уныния от приходящих к тебе отгонял еси и всех увещевал еси плоть духови покаряти и чистым сердцем пети Богу: Аллилуиа.

Икос 6

Приемый от Господа благодать разумения о Святей Троице на Афонстей Горе, во Иерусалиме и Царьграде, в России православныя веры проповедник явился еси. Мы же, верующе православно во Святую Троицу, с любовию вопием ти:
Радуйся, веры православныя среди неверных проповедниче;
радуйся, предивный Божий избранниче.
Радуйся, усердно призывающим тя помогаяй;
радуйся, добре стадо свое наставляяй.
Радуйся, людей земли Кавказския усердный заступниче;
радуйся, к Богу и Богородице непрестанный о них молитвенниче.
Радуйся, Царствия Небеснаго наследниче;
радуйся, веры Христовой дерзновенный исповедниче.
Радуйся, преподобне Феодосие, Кавказский чудотворче.

Кондак 7

Хотя Человеколюбец Господь явити в тебе, преподобне, Свое неизреченное к людям милосердие, показа тя яко воистину светило богосветлое: скорым твоим ходатайством чудеса многая и преславная совершаются. Ты же, старче, и при жизни достигл еси посещения небесных служителей, благодарне прославляя Всевышняго Бога: Аллилуиа.

Икос 7

Новаго видяще тя избранника Божия в земли Кавказстей, издалеча притекаху к тебе вернии в скорбех и болезнех, егда источник в пустыни ископал еси, старче Феодосие, и благодать на воду сию у Святыя Троицы испросил еси исцеляти телесныя и душевныя недуги. Сего ради взываем ти:
Радуйся, старче, рабе Господень;
радуйся, яко из уст твоих вернии благодатно напаяются.
Радуйся, духовною пищею алчущия питаяй;
радуйся, святою водою из источника твоего верным жажду утоляяй;
Радуйся, яко при жизни посещения Царицы Небесныя сподобивыйся;
радуйся, и святыми небожительми не оставленный.
Радуйся, яко благословением и советы людем верующим помогаяй;
радуйся, всех с верою к тебе притекающих на путь спасения наставляяй.
Радуйся, преподобне Феодосие, Кавказский чудотворче.

Кондак 8

Странное и преславное чудо дарова ти Господь, преподобне отче Феодосие, дар молитвенный, живых заступающий и от ада спасающий. Мы же Господу нашему, даровавшему нам таковаго молитвенника и ходатая о нас, вопием: Аллилуиа.

Икос 8

Всего себе Христу от чрева матерняго предал еси, блаженне Феодосие, умиленным сердцем и сокрушенною душею Тому всегда предстоя и духовная чада твоя научая хранити смирение и самоукорение, дар умиления стяжати. Сия слышавше, восхваляем тя сице:
Радуйся, Безкровныя Жертвы достойный совершителю;
радуйся, олтаря Господня благоговейный служителю.
Радуйся, светильниче духовных дарований;
радуйся, обитель иноческую на земли Кавказстей основавый.
Радуйся, тяжкая заточения Христа ради претерпевый;
радуйся, об изгнании своем ближним предсказавый.
Радуйся, любящим и чтущим тя ходатаю спасения;
радуйся, приводяй грешников ко исправлению.
Радуйся, преподобне Феодосие, Кавказский чудотворче.

Кондак 9

Вси людие удивляхуся тебе, старче Феодосие, яко призыванием Господа и имене твоего бесы изгоняются и одержимии исцеляются. Тако и мы, людие края Ставропольскаго, прибегающе к тебе, умиленно возглашаем Богу: Аллилуиа.

Икос 9

Разум человеческий не может изрещи обилие благодати духовныя, еюже ты, отче Феодосие, преисполнен еси, юже и мы получаем, в молитве к тебе обращающиеся. Сего ради сицевое пение приносим тебе:
Радуйся, молитвами твоими тьму напастей от нас отгоняеши;
радуйся, на узкий путь отрешения от мира нас наставляеши.
Радуйся, страданьми душу обогативый;
радуйся, утешение чадом духовным явивый.
Радуйся, Господом укрепленный;
радуйся, Духом Святым просвещенный.
Радуйся, среди горских народов поживый;
радуйся, и с иноверными в мире жити учивый.
Радуйся, преподобне Феодосие, Кавказский чудотворче.

Кондак 10

Богоборная гонения Церкви Православной видя, ты, отче Феодосие, желая помощи верным в трудную годину спастися, подвиг юродства приял еси, да явиши людем премудрости Божией велия дары, вопия Ему: Аллилуиа.

Икос 10

Стена еси и твердое прибежище нам, на Кавказе живущим и к заступлению твоему прибегающим, чудотворче Феодосие. Темже в бедах, скорбех, обстояниих и лишениих многих пребывающе, радующиеся твоему о нас заступлению, благодарне вопием ти:
Радуйся, в юродстве своем силу Божию людем православным явивый;
радуйся, грядущая, яко настоящая, провидевый.
Радуйся, прегрешений сокровенных обличителю прозорливый;
радуйся, жителем града Минводы беды и несчастия в притчах предсказавый.
Радуйся, детей малых от огненнаго запаления чудесно избавивый;
радуйся, призывающим тя скорый помощниче.
Радуйся, любви и смирению свою паству научаяй;
радуйся, от мысли о самоубийстве упавших духом отвращаяй.
Радуйся, преподобне Феодосие, Кавказский чудотворче.

Кондак 11

Пение всеумиленное Пресвятей Троице принесл еси, егда душу свою Спасителю мира в руце предал еси и с лики Ангел в небесная селения вселился еси, воспевая Богу: Аллилуиа.

Икос 11

Видевше людие, угодниче Божий Феодосие, мирную кончину твою и чудеса, на гробе твоем творимая, возрадовашася; темже в уповании всесильнаго предстательства твоего у Престола Пресвятыя Троицы уверившиеся, с любовию взывают ти:
Радуйся, Господь бо тя в обители небесныя всели;
радуйся, кончину бо твою кампанов звон чудесно возвести.
Радуйся, яко гроб твой Ангели сопроводиша;
радуйся, яко на могиле твоей людие столп огненный видеша.
Радуйся, от мощей бо твоих вернии получают исцеления;
радуйся, притекающих ко гробу твоему крепкое заступление.
Радуйся, таин Божиих вечный зрителю;
радуйся, от бед и горя скорый избавителю.
Радуйся, преподобне Феодосие, Кавказский чудотворче.

Кондак 12

Благодать Божию приял еси, преславне Феодосие, яко при жизни твоей светильник был еси приходящим к тебе с верою, и по смерти своей возсиял еси светом чудес твоих, да живущии на земли Кавказстей, дивящеся о славе твоей, взывают Богу со умилением: Аллилуиа.

Икос 12

Поюще Бога, дивнаго во святых Своих, восхваляем тя, преподобне отче Феодосие, ты бо еси образ жития юным, правило веры мужем, в старости учитель старцев, нам же всем молитвенник и предстатель. Сего ради вопием ти:
Радуйся, долголетием от Бога одаренный;
радуйся, и по смерти чад своих не оставивый.
Радуйся, обилие чудес верным явивый;
радуйся, всем с верою приходящим к мощем твоим помогаяй.
Радуйся, на стезю спасения всех наставляющий;
радуйся, Церковь Святую от неверия и расколов сохраняющий.
Радуйся, во бранех верный о нас молитвенниче;
радуйся, архиереев и иереев земли Кавказския покровителю и скорый помощниче.
Радуйся, преподобне Феодосие, Кавказский чудотворче.

Кондак 13

О пречудный угодниче Божий и чудотворче, преподобне отче Феодосие ! Ты воистину дар Божий еси нам, иже во иночестве, и во священстве, и во юродстве Триипостаснаго Бога прославил еси. Приими малое сие моление наше и умоли Господа Бога, да помилует нас твоими мольбами и на путь покаяния всех наставит, вопиющих Ему: Аллилуиа.
(Этот кондак читается трижды, затем 1-й икос: Ангелов Творец... и 1-й кондак: Избранный угодниче Христов...)

. . . . . . . . . . . . . . . . . . . . . . . . . . . . . . . . . . . . . . . . . . .

Молитва преподобному
Феодосию Кавказскому

О святый угодниче Божий, преподобне отче Феодосие !

Ты, от юности Христа возлюбивый и Единому Ему последовавый, удалился еси на Святую Гору Афонскую, в удел Матери Божия, и оттуду ко Гробу Господню притекл еси. Тамо во священном сане многая лета пребывая, совершал еси усердная моления за Землю Российскую, за Церковь Православную и за народ русский.

Егда же постиже Русь Святую лихолетие безбожия, ты, Афон и Иерусалим оставив, вернулся еси во Отечество свое, разделяя горе и страдания народа своего и Церкви нашея Святыя, якоже монах и священнослужитель, даже до темничнаго заточения. Вера твоя, кротость, смирение и терпение умиляху огрубевшая сердца в заточении с тобою пребывавших.

В годы брани ты, отче, помогал еси народу православному одолети врага и супостата, и многих спасл еси, иже от уныния, горя и отчаяния жизнь свою скончати восхотеша. Помощию твоею вернии укрепляхуся во уповании своем, яко не оставит Господь Отечество наше, Мати Божия сохранит удел Свой, и гнев Божий Ея молитвами на милость претворится.

Многотрудный твой подвиг юродства Христа ради удиви, отче, не токмо нас, земных, но и небожителей, являвшихся тебе. Вся бо может сотворити молитва праведника, верою крепкою поспешествуемая.

Ты веси нужды и печали наша, преподобне отче Феодосие, веси и желание наше со Христом быти. Пройдя тесный и тернистый путь земнаго бытия, ты несл еси ярем тяжкий от братий своих, от неверных и соплеменников. Помяни нас, старче Божий, у Престола Господня, яко обещался еси помогати всем, иже обратятся к тебе.

Память о тебе, отче, не оскудевает на земли Кавказстей и до ныне: се бо с верою и упованием притекают православнии людие к месту твоего упокоения, просяще заступления и помощи.

Просим тя, преподобне отче Феодосие: помози нам в трудный час жизни нашея, в скорбех и страданиих, умоли Начальника мира Господа, да умягчит Он злая и огрубевшая сердца человеческая и умирит народы Кавказа, да разорит нечестивыя советы раскольников и еретиков, возстающих на Церковь Русскую Святую.

Твоими молитвами, святче Божий, да простит нам Господь всякая прегрешения, да минуют нас стрелы вражия и козни диавольския. Испроси у Творца и Промыслителя жизни нашея время на покаяние, от пагубы избавление, болящим здравие, падшим возстановление, скорбящим утешение, чадом в страсе Божием воспитание, отходящим к вечности благое уготовление, отшедшим упокоение и Небеснаго Царствия наследование.

Буди, отче Феодосие, покровитель и помощник всем верным земли Кавказския. Да укрепится и умножится на ней и во всей Руси Велицей Святое Православие. Мы же, святыми твоими молитвами укрепляеми, прославим Живоначальную Троицу и твое освященное Богом имя, ныне и присно и во веки веков. Аминь.

. . . . . . . . . . . . . . . . . . . . . . . . . . . . . . . . . . . . . . . . . . .

Молитва вторая

О преподобне и богоносне отче наш Феодосие ! Служением молитвенным, бдением, пощением и окормлением духовных чад твоих ты стяжал еси велию благодать и милость у Господа. И ныне, пред лицем славы Его предстояй и неизглаголаннаго блаженства наслаждаяся, умоли Человеколюбца Бога избавити чад твоих (имена) от скорбей и болезней, бесовских искушений и нападений, волхования и человек лукавых, диаволом наущенных вредити чадом Божиим, и от всякаго зла, простити нам согрешения наша, вольная же и невольная, да молитвами твоими спасаеми, достигнем кончины живота нашего безболезненныя, непостыдныя и мирныя, и сподобимся получити блаженства обители райския. Аминь.